మానవత్వాన్ని మించింది లేదు. karona (9)

శీర్షిక: మానవత్వాన్ని మించింది లేదు. (9)

తేది: 19-04-2020

కోటి ఆశల నూతన సంవత్సరం 

కొంగ్రొత్త ఆలోచనలతో కొత్త కొత్త ఆశయాలతో 

ఊపిరి సలుపని ఊసులతో 

ఉరుకులు పరుగులు పుంజుకున్నదో లేదో.... /

పులి మీద పుట్రలా ముళ్ళ కిరీటం ధరించి

కలి ధర్మపు కాల శిక్షలా పయనమైన కరోనా

కఠిన పాషాణపు కబంద హస్తాల్లో చిక్కించుకుని

మహమ్మారి వేషంతో విశ్వాన్ని చుట్టి కబళిస్తున్నది..../

పసందైన జీవనవిధానమని 

ప్రశస్తమైన సంక్షేమాలనే భ్రమలతో 

అభివృద్ధికి నిర్వచనమైన అగ్రరాజ్యమని 

అర్రులు చాచి అంగలేసిన యువతకు ....../

ఆర్థికతలో అగ్రగామినంటూ విర్రవీగి

ఆయుధాలలో తారాజువ్వనంటూ పైకెగసి

నింగి నేల నీట అన్నింటా నేనేనంటూ

నక్షత్ర పోరుకు నాందీ పలికిన అగ్ర రాజ్యం ..../

అత్యంత కీలక ఆరోగ్యాల విషయాన 

చేతులెత్తేసిన పాలక నిర్ణయాల వెనక

చేవ చచ్చిన వైద్య విధానాల సమయాన

కలి నాగుల కరోనా రక్కసి కరాళ నృత్యం చేస్తుంటే 

కనీస మందులు పొందలేని స్థితిలో 

కలుక్కుమంటున్న కన్న గుండెలు అంతటా...../

అధిక జనాభా అభయారణ్యాలతో  

అరకొర వ్యవస్థల భాండాగారాలతో 

అపవాదులన్ని మూటగట్టుకున్నప్పటికీ 

అగ్రరాజ్యం మొదలు అడిగినవారందరికి 

అపర ధన్వంతరియై ఔషధ ఔదార్యాల హస్తం

అందించి ఆత్మీయతలు చాటుకున్న వితరణశీలి నాదేశం....  /

ఓడలు బండ్లు... బండ్లు ఓడలయునా

మానవత్వము మించిన మతలబు లేదంది 

నాదేశం..... /

నగునూరి రాజన్న

హైదరాబాదు.