శార్వరి ఉగాదికి స్వాగతం

శార్వరికి స్వాగతం

తేది - 24-03-2020

శీర్షిక - ఒంటరి  ఆహ్వానం... ! 

సంఖ్య - 376   

కవలలైన తెలుగు లోగిళ్ళు 

కలిసి మెలిసి ఆహ్వానించే స్థితి లేదు.... 

వింత పోకడల వికారితోనే విసిగిపోయాము తల్లీ 

అంటు వ్యాధితో తంటాలు పడుతూ 

తలంటు పోసుకుంటున్నాము ....  

కత్తులు లేకనే కుత్తుకలు తెగి పడ్తున్నయి 

కనిపించని శత్రువుతో కవాతు చేస్తున్నం ... 

పేరుకు నువ్వు "శార్వరి " వయినా 

నిర్వికార నిశి చీకట్లను తరిమి 

పెన్నిధివై నిలువమ్మా పెద్ద దిక్కుగా..... 

కష్టకాలపు కూడలిలో దిగ్బంధమై పోయాము 

కానరాని భవిష్యత్తులో కొట్టుమిట్టాడుతున్నం....
కరోనా పుణ్యమాని కలిసి మెలిసి నడవలేం..... 

కమనీయపు తొలి తెలుగు పర్వానివీవు   

కంటి వెలుగువై కనికరించమని వేడుకుంటున్నం ... 

కాలమనే కష్టసుఖాల జీవిత పుస్తకములో 

మరో కొత్త పేజీ కొలువైన తరుణాన
గడప లోపలే బందీ అయిపోయాము. 

కమ్మని కబురేదైనా కడుపు నింపుతుందేమోనని 

కళ్ళు కాయలు కాసేలా ఎదురు చూస్తున్నం..... 

ప్రకృతిలో ప్రభవించే పరవశం 

ఋతువుల్లో పల్లవించే వసంతం
కాల మార్పుతో కలిసి వచ్చే కనికరం 

మా జీవితాన అద్భుతమై సంభవించాలని 

మరి మరి వేడుకుంటూ ఒంటరిగానే పలుకనా ఆహ్వానం...!

నగునూరి రాజన్న

కరీంనగర్