మాతృ భాష మకరందము

మాతృ భాష అనగానే -మనసు పులకరిస్తుంది 

మమత వెళ్లి విరుస్తుంది -మమేకం అవుదాం అనిపిస్తుంది 

అచ్చులు పదహారు- హల్లులు ముప్పదెనిమిది 

ఉభయాక్షరములు  మూడింటితో-వర్ధిల్లుచున్నది తెలుగు వర్ణమాల 

రాయల కాలములోనే - రాచ మర్యాదలు అందుకున్నది 

అష్ట దిగ్గజములతో అలరించి -అపర ఖ్యాతిని పొందినది 

ఎందరెందరో మహానుభావులకు - ఏలికగా నిలిచి ఖ్యాతి తెచ్చినది 

నాటి నుండి నేటి వరకు వారధిలా నిలిచినది-తెలుగు వారికి గౌరవాన్ని కూర్చినది 

నన్నయ్య, తిక్కన, ఎర్రన, పెద్దన - శ్రీనాథుడు,మొల్ల,తిమ్మన 

అన్నమయ్య, త్యాగయ్య,  రామదాసు ,గురుజాడ ,

విశ్వనాథుడు, జాషువా, శ్రీ శ్రీ,  సి నా రే ఆదిగా గల అందరూ 

ఆ తల్లి సేవలో తరించిన కన్న బిడ్డలే

పాలు మీగడలకన్నా, తేనె ధారలకన్నా -మధురమైనది మన మాతృ భాష 

పరికించు మిత్రమా బహు లెస్సగా - అమ్మ  లాలి పాటలే అందుకు సాక్ష్యం 

పరాయి భాషలకు కిరాయి మనుషులుగా - సంకర భాషలకు దాసోహం అనకుండా 

మాతృ భాషా మహాత్యాన్ని గుర్తించుదాం - మనవంతు కర్తవ్యాన్ని నిర్వహిద్దాం 

బ్రౌన్ లాంటి పరదేశీయుడే - బహులెస్సగ  ప్రాకులాడి 

భాషాభివృద్దికి నిలిచాడు - బహుళ ప్రాచుర్యం పొందినాడు 

భాషా భాగములు, వ్యాకరణ ఛందస్సులు-సంస్కృత సంధులు , సంక్లిష్ట సమాసములు కాదు 

సరళమైన భాష పైన స్వచ్చమైన అభిమానం చాలు-పది కాలములు పదిలముగా నిలుపుటకు  

ముత్యమంటి అక్షరముల     - మాతృ భాష మకరందము 

ముద్దులొలుకు పదకూర్పుల - మమకారముతో నింపుదాం 

ఆత్మీయత జోడిస్తూ           - ఆదరిస్తూ ఎల్లప్పుడు 

ముందు తరాలకు అందిద్దాం - ముచ్చటైన మార్గ దర్శకముగా...