కరుణ గల్ల వరుణుడు

కరుణ గల్ల వరుణుడు - ఎందుకో కన్నెర్ర   జేస్తున్నడు

కర్షక లోకాన్ని-  కకావికలం కావిస్తున్నాడు 

అల్ప పీడన ద్రోణిగా - రైతు పీడనకై వస్తున్నవి

అకాల వర్షాలకు - ఆగమై పోతూనే ఉన్నడు   అన్నదాత 

అదిలాబాదు మొదలుకుని - ఆసాంతం రాష్ట్రములో 

అతలా  కుతలమౌతున్నది  - ప్రజా జీవితం పదే పదే  

క్యుములో నింబస్ లంటూ - కుమ్మరించి పోతున్నయి   

కుదేలై పోతున్నయి పంటలు  - కుండపోత వర్షాలకు  

వరిపంటలు, వాణిజ్య పంటలు - పండ్ల తోటలు 

వరుసబెట్టి పాడై పోతున్నయి - మోడువారి పోతున్నయి

చేతి కందే పంట గింజలు - నేల రాలి పోతున్నయి

వడగండ్ల వానలోచ్చి- కడగండ్లు మిగుల్చుతున్నయి 

అనావృష్టితో  కొన్నాళ్ళు - అతివృష్టిలతో కొన్నాళ్ళు 

ఆరుగాలం శ్రమించే రైతన్నలు -

అదేపనిగా అపదల నెదుర్కుo టున్నారు 

బిక్క వోయిన బక్క  రైతన్న - దెబ్బ దెబ్బకు చిక్కి శల్యమై 

బ్రతుకు చిద్రమై - బజారున పడుచున్నాడు 

కంటికి రెప్పలా కాచుకున్న పంటలన్నీ 

కబలించుకు పోయే - కరుణ గళ్ళ వరుణుడు 

అకాల వర్షాలకు - ఆగమౌతున్న ఆత్మబంధువు రైతన్నను

సకాలంలో స్పందించి - సాయమందించాలి ప్రభుత్వాలు