కల్తీ భూతం

స్వచ్చమైన వాణిజ్యం సజావుగా జరిగినన్నాళ్లు -

సాగలేదు ఎలాంటి కల్తీ సరుకుల్లోన

వాణిజ్య నీతి , ధర్మం తెలియని దళారుల ప్రవేశంతో - వ్యాపారం

అంతులేని (చిక్కని) కల్తీలతో రాజ్యమేలుతుంది

పండ్లు, కూరగాయలకు రంగులు, వ్యాక్సులు అద్దుతూ

పప్పు, బియ్యం , ఉప్పు , కారం లో నాసి రకాలు కలుపుతున్నారు

పాలల్లో  యూరియా ,పాలిథీన్లను కలుపుతూ

నూనెల్లో - మృత మాంసపు నూనెలను కలుపుతున్నారు

ప్రతీ వాడు - ఇతరుల కొరకనుకుని అనుకుంటున్నారు

తమ దాకా వచ్చేసరికి - కల్తీ కల్తీ అని వాపోతున్నారు

ఇరుగుపొరుగు క్షేమం - ఇంటిల్లిపాది లాభమన్నట్టు

మన నుండే మొదలవ్వాలి ఏ మంచి పని అయినా

అనేక రకాల అంతు చిక్కని కల్తీలతో  -  

అజీర్ణం మొదలుకుని , వాంతులు , విరేచనాలు

శ్వాస కోసం వ్యాధులు,గుండెపోటు, కిడ్నీలో రాళ్లు - 

కాలేయం, కళ్ళు, పళ్ళు అన్నింటికీ ముప్పే.

ఇక ప్రాణాలు కాపాడాల్సిన మందుల్లో అవుతే- 

ఇంకా ఫలితాలు తెలియని మందులు సైతం

ప్రజల మీద ప్రయోగిస్తూ కొంత మంది వైద్య నిపుణులు - 

క్రూరమైన తమ మనస్తత్వాన్ని చాటుకుంటున్నారు.

కల్లా కపటం తెలియని పిల్లా పాపలు మొదలుకుని-

కండలు తిరిగిన గుండాలైన, గర్భస్థ శిశువైన

కల్తీ కసాయిల దళారుల తాకిడికి  - 

కలత చెంది వణికి పోతున్నారు ప్రజలంతా.

కూర్చున్న కొమ్మ నరుక్కున్న విధంగా -

కొరివితో తల గోక్కున్న చందంగా

కల్తీలో మునిగి తేలుచున్నాము  - 

కల్తీ లేకుంటేనే  "నకిలీ "  అనుకునే స్థితికి వచ్చాం

మహానగరమంతటికి నలుగురే ఫుడ్ ఇన్స్పెక్టర్లంటే-

నామ మాత్రపు అజమాయిషీ ఉన్నదన్నమాటే

కలి మాయ లాంటి కల్తీ మహా భూతం - 

కబళిస్తుందేమో మానవాళిని సాంతం.

పర్మిషన్లు లేని ఫలహారశాలలు -

అజమాయిషీ కరువైన  ఆహారశాలలు

డబ్బు వెనక మనిషి పరుగెడుతుంటే -

జబ్బులన్నీ మనిషిని అంటుకుని ఉంటున్నాయి

రౌతు మెత్తనయితే గుర్రం మూడు కాళ్ళ పైన పరుగెత్తినట్టు

రాజు మెత్తనయితే రౌడీయిజం రాజ్యమేలినట్టు

శాసనాలు అలుసయితే వ్యసనాలు పెరిగినట్టు –

శిక్షలు ఉదారమైతే స్వార్థ చింతన సవారీ చేస్తుంది.
 

చిన్న చిన్న కల్తీలన్నీ - చిక్కు వీడని ప్రశ్నలా

చిలికి చిలికి గాలి వానై - ఉప్పెనలా ముంచుకొస్తుంటే

ప్రజలంతా మేల్కొని - ప్రతిస్పందించి ప్రశ్నించాలి

ప్రభుత్వాలేమో నవ్య సాంకేతికతతో  నివారించాల్సిన సమయమొచ్చింది