mother theressa photos
చిత్ర కవిత - 9
తేది: 26-10-2020
శీర్షిక: అల్బేనియా ఆడపడుచు
సంఖ్య: 548
కలకత్తా వీధుల కరాళ నృత్యమో
కరువుల కాటకాల సంఘటనలో
ఆశ నిరాశల అకాల మరణాలో
వేదభూమే వెన్నుతట్టి కన్ను తెరిపించిందో...
కాళీమాతనే కరుణామయి అయిందో
అధ్యాపకురాలయిన అల్బేనియా
ఆడపడుచు అడుగులు కదిలి
అకుంఠిత సేవకు శ్రీకారమైనాయి....
సానుభూతి వచన సాంత్వనలకన్నా
సపరిచర్యల ఆత్మీయతలే మిన్నని
అనాధ బీద పేదల అంటువ్యాధుల
కంటి వెలుగయిన కాంతి బంధువు ...
కుష్టులతో కునారిల్లే బీదలకు
అగ్నికీలలా దహించే క్షయగ్రస్తులకు
హెచ్ ఐ వి ఏడ్స్ ల బడుగులకు
మిన్నంటే ఆశయాల పొదరిళ్లయి
నిలిచింది మిషనరీస్ ఆఫ్ ఛారిటీగా ....
విమర్శలెన్ని విచ్చుకత్తులైనా
సమస్యలెన్ని చుట్టుముట్టినా
పట్టు సడలని గట్టి దీక్షలతో
మెట్టు మెట్టుగా ఎదిగింది
విశ్వ వీధి గగనాన 120 పైగా
దేశాల్లో 600 శాఖలకు విస్తరించి....
చంద్రునికో నూలు పోగులా
సత్కరించి గౌరవించిరి
సమున్నత భారత రత్నగా మరియు
నోబెల్ శాంతి బహుమతులతోడ ...
నగునూరి రాజన్న
కరినగరము.
No comments:
Post a Comment