నా కవితా యానం
తేది: 28-10-2020
శీర్షిక: యాదృచ్చికమే...
సంఖ్య : 550
అమృతమయులు అమ్మానాన్నలు
అందించిన అక్షరసంపదల వేళా విశేషమో
వివిధ గురువులు విరివిగ బోధించిన
విలువైన పద సంపదల పొందికలో ...
ఉరుకు పరుగుల ఉద్యోగ ధర్మంలో
పిల్లా పాపల చదువుల పర్వంలో
వత్సరమొక క్షణంలా కరుగుతుంటే
వచ్చినవి వాలుగా వరుస సందర్భాలు....
తెలియకుండానే తేనెలొలుకు తెలుగు
మధురిమలను మనసారా గ్రోలసాగాను
అందమైన అక్షర బంధాలకు బందీనయి
యాదృచ్ఛికంగా ఆకర్షితుడనయ్యాను.
మా కంపనీ ఊసుల కలబోతల రాణి
వీణాపాణి త్రైమాసిక జ్యోతివాణిలో
అప్పుడప్పుడు గుప్పెడు అక్షరాలు
నా పేర్న అచ్చయితే ఆనందించాను...
మెప్పుల వెన్నెల వెలుగులకు ఉప్పొంగక
వెటకారాలకు శస్తాలకు వెన్ను చూపక
కదులుతున్న కమనీయ తరుణాన
కలిసిపోయాను నేటి కవితా సమూహాన....
నగునూరి రాజన్న
కరినగరము.
No comments:
Post a Comment