అంశం: స్వేచ్చా కవిత
తేది: 28-10-2020
శీర్షిక : గాలి కష్టాలు తోడైతే...
సంఖ్య : 027
పచ్చ మెరుపుల తివాచీలు
పరుగు పరుగుల గలగలలు
పైరగా వీచే గాలి గుసగుసలు
పండగలా తోచే పర్వత శ్రేణులు...
యుగ యుగాల అమూల్యం
ప్రాణ కోటికి అదెంతో పదిలం
అపరిమితమైన సంపదతుల్యం
అనన్యమైన గుణనిధులమయం
పంచడమే తెలిసిన ప్రకృతి ....
అవపోశనల అనుభవాలు
అందించినా సంప్రదాయమై
అవహేళనల అలక్ష్యాలు తోడైతే
అందిస్తుందా చేయూత ఆసాంతం...
స్వార్థాల సంకుచితాలకు
అత్యాశల చిక్కుతాళ్లకు
బొక్క బోర్లా పడుతున్న
ప్రకృతిలోని ప్రతి అణువు
కలుషితాల కబంధాలలో ....
ఊహకందని ఉజ్జాయింపులు
ఇలాగే కొనసాగితే ఎలా కుదిరేను
ముందు తరాల పొందైన జీవనం
నీటి కష్టాలకు గాలి కష్టాలు తోడైతే
అడుగడుగున జీవన్మరణమే మానవాళికి ....
నగునూరి రాజన్న
కరినగరము.
No comments:
Post a Comment