నమ్మకం

తేదీ 04-08-2018

ప్రతీ క్షణం మనం శ్వాసించే 

కోటి ఆశల పునాదికి నాంది 

కొండంత నమ్మకమే 

పెను సవాళ్లతో పెంచే తల్లి తండ్రులకు 

పిల్లలే వారి సర్వస్వమనే నమ్మకం 

ఉన్నత శిఖరలాశించే విద్యార్థులకు 

ఉద్బోధలందించే గురువులే నమ్మకం. 

ప్రేమ పూతోటల్లో విహరించే ప్రేమికులకు 

పున్నమి వెలుగులు నింపుకోగలమనే నమ్మకం. '

ఖండాంతరాలకు కదిలే యువతకు 

కమ్మని భవిష్యత్తు నింపుకోగలమనే నమ్మకం. 

ప్రశాంత జీవనాలాశించే ప్రజలకు 

పహారా కాసే జవాన్లే నమ్మకం. 

అనంత విశ్వ రహస్య ఛేదన శాస్త్రవేత్తలకు 

అనన్య సామాన్యమైన సాంకేతికతే నమ్మకం. 

రుధిర కాలువలెన్ని పారించినా 

మదిన కోరే స్వతంత్ర జీవనానికి,

బానిస సంకెళ్ళ బంధనాల  విముక్తికి 

అహింసే అన్నివిధాలా నమ్మకమైనది.  

పది మందికి అందుబాటైన  పల్లె పంచాయతీ అయినా 

దేశ ప్రజలను పాలించే  ఢిల్లీ పార్లమెంటైనా

పేదరికాన్ని పారద్రోలాలనుకునే ప్రపంచ బ్యాంకుకైనా  

అందరి సంక్షేమాల ఆశల ఆలంబనలే నమ్మకం.  

అప్పుడప్పుడు కుక్క మూతి పిందెలవలన 

అపశ్రుతులు దొర్లినా 

అపార నమ్మకమనే ఆయుధమే 

అపర కాళికలా అణువణువున నిండి 

చరాచర జగత్తును జాగృత పరుస్తూ 

పురోగతికి బాటలు వేస్తున్నది.