నగునూరి రాజన్న
అంశం :మానసిక సంఘర్షణ
తేదీ 07-08-2018
శీర్షిక ; పుట్టినూరు
మనసంటే ఏమిటో
ఎలా ఉంటుందో
ఎక్కడ ఉంటుందో
ఎంత ఉంటుందో
ఏమి చేస్తుందో
ఎలా మసులుకుంటుందో
ఎందుకు మారుతుందో
ఎందుకు మొండికేస్తుందో
ఎందుకు బాధ పడుతుందో
ఎందుకు సంతోష పడుతుందో
ఎందుకు పరుగెత్తుతుందో
ఎందుకు మౌనం వహిస్తుందో
ఎలా పర్యవేక్షించుకోవాలో
పదే పదే ప్రశ్నించుకున్నా
పరి పరి తపించుకున్నా
పట్టు చిక్కడం లేదు
గుట్టు విప్పడం లేదు.
అనేక ప్రక్రియలకు
ఆలవాలమైన
భావ ప్రకటనల
భాషా ప్రపంచపు
కవన రంగములో
వర్ణమాల నేర్చుకుంటున్న
వరుస క్రమంలో
చిట్టి పొట్టి అడుగులేస్తున్న
చిరు విద్యార్థిని నేను.
కన్న తల్లి తండ్రులను
కన్న తల్లి లాంటి పుట్టినూరును
తెల్సి తెలియని వయసున
చదువులకై , కొలువులకై
వదిలిన రోజు కూడా వగచలేదు.
కాని
మా పల్లెలో నేను
పుట్టి పెరిగిన ఇల్లు
అన్న దమ్ములతో
అక్క చెల్లెళ్ళతో
ఆత్మ బంధు మిత్రులతో
ఆడి పాడి అలకలు తీర్చుకున్నది
చదువు సంధ్యలు
నేర్చుకున్నది
ఇంతటి వాడి నవడానికి
ఇలవేల్పై తోడు నిలిచి
అంకురమైన పొదరిల్లు
నిన్నటి రోజున
కూలుతున్న సందర్భములో
విప్పుతున్న ఛాయా చిత్రాలు
చూస్తుంటే జరిగిన నాలోని
మానసిక సంఘర్షణ
నా అరువదేండ్ల జీవితానికి
నిలువుటద్దమైన వేలుపు
ఆనవాళ్లు కూలిపోతుంటే
అతలాకుతలమైన
నా మనో వైకల్యాన్ని
ఎలా ఆవిష్కరించుకోవాలో
అంతు చిక్కలేదు.
పుట్టినింటి ఆనవాళ్లు
అంతరిస్తుంటే
కళ్ళ ముందే
కారుచీకట్లు కదులుతున్నట్లు
ప్రశాంత సముద్రములో
సునామీ చుట్టుకున్నట్టు
జీవితాన ఇంకేమి
సాధించలేమో అన్న
నిర్వేదం ఆవరించినట్టు
కాలు చెయ్యి ఆడక
అంగవైకల్యం జరిగినట్టు
గుండెల్లో గునపాలు
గుచ్చుకున్నట్టు,
వేల అణువుల విస్ఫోటనం
చెందినట్టు,
పదే పదే లబ్ డబ్ లు
చెవిన పడుతున్నట్టు,
పదే పదే గొంతు
తడారి పోయినట్టు,
నాలుకేమో పిడుచ కట్టి
నవరంధ్రాలలో వేడి
ఆవరించినట్టు
పంచ ప్రాణాలు
గాలిలో తేలుతున్నట్టు
ఈ ప్రపంచం ఆగిపోతే
బాగుండనిపిస్తుంది.
పాల సముద్రం లాంటి
మానవ మస్తిష్కంలో
భావ పరంపరల మథనంలో
జరిగే ధన ఋణ వర్తనాల
ఆలోచనా పరంపరల
రసాయన ప్రక్రియలకు
జరిగే ఆవిష్కరణల సారానికి
సంభవించే స్పందనలే
మానసిక సంఘర్షణ.
మేధో మథనం గావించుకుని
విషాన్ని విసర్జించి
అమృతం సాధించినట్టే...
విచక్షణ మేళవించుకుని
వాసి గలిగిన రాశి ఆలోచనలతో
జీవితాన ముందుకు సాగాలి.
No comments:
Post a Comment