సందళ్ళ మాసము. శ్రావణమాసము

సందళ్ళ మాసము. 

అమ్మ వారి నక్షత్రమైన శ్రవణమందు 

శశి సంచరించ శ్రావణమాసమై వినుతికెక్కె 

సకల శుభాలకు నిలయమై,వర్షాలతో 

పంచభూతములన్ని పరవశించ 

పచ్చ తివాచియై భూదేవి మెరువంగ

పిల్లా పాపలంతా సల్లగుండాలని 

శుచి శుభ్రతలకు పెద్ద పీట వేసి 

మడి ఆచారాలకు అంకురమయ్యె. 

బహిర్ స్నానాలు, వన భోజనాలు 

బ్రతుకు ఆరోగ్యాన బహు మంచి మేలని 

జనులెల్ల పాటించే జగతిలోన. 

సంతానార్ధులంతా సాగిలపడి కొలిచె 

శ్రద్ధ తోడుత శుద్ధ పంచమి నాడు నాగన్నకు 

పడతులంతా జేరి పట్టు వస్త్రములు ధరియించి 

బంగారు నగలన్నీ బహుగ చక్కంగ అలంకరించుకుని 

వరలక్ష్మి వ్రతములు,మంగళ గౌరీ వ్రతములు చేసి 

పసుపు, కుంకుమ, పూలు, పండు తాంబూలాదులు 

పాదముల పారాణి నంటి వాయనములిచ్చుకుందురు 

వరుసగాను ఘన శ్రావణము నందు . 

అనుబంధాలన్నీ అజరామరమై నిలువ 

ఆత్మీయతల తోడ అక్కచెల్లెళ్లు కట్టె 

అన్నదమ్ములకు రక్షా బంధనం. 

యదుకుల భూషణుండు యశోదనందనుండు 

రాధికా వల్లభుండు, రమణి లోలుండు 

గోపాల బాలుడు గోపికా వల్లభుడు

దేవకీ అష్టమ గర్భమున  జన్మించ 

చిన్ని కృష్ణుని శ్రీకృష్ణ జన్మాష్టమి సైతం ఈ మాసమందే. 

అందుకే శ్రావణమాసమంతా సందళ్ళ మాసము సంతోషాల మాసము.