వీడని నీడ
తేది : 31-05-2022
శీర్షిక : అస్థిత్వపు ఆనవాలు
కవిత సంఖ్య : 912
ఉత్తర ప్రత్యుత్తరాలు లేకున్నా
ఉదయాత్పూర్వపు వెలుగులతో
బయటి ప్రపంచానికి బయలుదేరగానే
నేనున్నానంటూ అనుసరిస్తుంది
జీవిత భీమా భాగస్వామిలా .....
ఆజానుబాహువును
అర మురుగుజ్జుగాను
మురుగుజ్జును సైతం
ఆజానుబాహువుగాను ....
ఉభయ సంధ్యలలో పొడవై
మిట్ట మధ్యహ్నం పొట్టియై
అస్తిత్వపు ఆనవాలుగా
చల్లగా అల్లుకుపోతుంది ....
మనిషి అరిషడ్వర్గాల అల్లుడైనా సరే ...
రాజు పేద భేదమెరుగక .....
తాను మాత్రం స్వార్థమెరుగని
సరంగులా... ప్రతిఫలాపేక్షలు
ఎరగని ప్రాణస్నేహితునిలా ...
అంటి పెట్టుకునే ఉంటుంది .....
నీడలే కదా అని తోసేయకు
మిత్రమా....జాడల ఊడలవి
మనిషి ఉనికికి ముఖ్యంగా
మనువున్నదనే ధ్రువపత్రం .....
నీడల గారడీలే వినోదాల వింతలు
గ్రహాల నీడలే గగనాన గ్రహణాలు
సమయసూచీలకు సాంకేతికతలకు
విజయ విజ్ఞానాల సవ్యసాచి......
నగునూరి రాజన్న
No comments:
Post a Comment