ఆవిరి గీతం
తేది: 26-05-2022
శీర్షిక : ఎన్నికల హామీలు
కవిత సంఖ్య : 910
రాజుల రోజులు పోయి రాజ్యాలు
మారినా ... ప్రజాస్వామ్యం పేరిట
ప్రజలే పాలకులయినా .... ఇంకా
ఎదురు చూపులే అట్టడుగులకు ....
యుగాలు దాటి పయనించినా...
జగాన తేజమే రామ రాజ్యము ...
కాదు పాలకులకు కనువిప్పు ...
కలి మాయల పరదాలవల్లనేమో...
వజ్రోత్సవాల వంతులో కూడా
పస్తులుండి పూటలు మానేసి
కుప్పలు పోసిన పన్నులన్నీ
తిప్పళ్లకు సరిపోక... జోలెలతో
అప్పుల సామ్రాజ్యాల ఆనవాళ్లే ...
దగుల్బాజీ దాగుడుమూతల
కుర్చీలాటలో...రంగులు మారుస్తున్న
రాజకీయ పార్టీలన్నీ...కళ్ళు బైర్లు కమ్మే
ఉత్తుత్తి హామీల ఊకదంపుడు మూటలతో ...
బాకరాయుళ్ల బతుకు చిత్రం ....
సంక్షేమ పథకాలు... ఉపాధి హామీ
పథకాలు .... నిరుద్యోగులకు భృతులు
పేదలకు గేదెలు .... పెద్దలకు పెన్షన్లు
ఆడవారికి చీరెలు ... పిల్లలకు పాలు ....
అన్నీ ఇస్తారు కానీ విద్య వైద్యం
అధికారం అందనీయరు ...
ఆడవారికి అర్ధశాతం ఆరక్షణకు
అనుమతులు రానివ్వరు...
సప్త వర్ణాల సింగిడిలో ఎన్నికల
హామీల పత్రాలన్నీ ఎగిసిపడే
ఆర్భాటాలు చూస్తుంటే ..ఆవిరి గీతాలు
ఆలపించడమే ....ప్రజల కింకర్తవ్యం....
నగునూరి రాజన్న
No comments:
Post a Comment