ఆశ 02 - 11 - 2018

అంశం : ఆశ
02 - 11 - 2018
శీర్షిక : అభివృద్ధికి చుక్కాని....
సంఖ్య: 86

ఉరకలేసే మనసులో  అప్పుడప్పుడు 
ఊహలకి రెక్కలొచ్చి విహరిస్తూ
ఉసిగొల్పిన ఆలోచన పరంపరలు
ఉవ్వెత్తున ఎగిసిన తరంగాలే కదా....

ఉన్న స్థితిలో మార్పు కోరుకుంటూ
ఉన్నత శిఖరం చేరుకోవాలని ఆశ.....

పశు సమూహాల నుండి
పదిలంగా దూరం చేసింది .....
పనిముట్లకు రూపకల్పన గావించి
పట్టం కట్టింది .........
ప్రస్తుత సుఖమయ జీవనానికి
పరవళ్లు తొక్కింది.......
పటుతరమై తీర్చి దిద్దింది
పసిమి వన్నెల ఆశే కదా........

ద్రవ్యోల్భణాల దగుల్బాజీ లెక్కలెలా ఉన్నా
శ్రమ దోపిడీతో చాలీ చాలని జీతాలున్నా
సజావుగా బతుకు సాగితే చాలని
 సామాన్యుడి ఆశ......

వందల మందికి మేలు జరగాలని
పన్నులు కడుతూంటే..........
ప్రతి చిన్నారికి సౌష్టవమైన పౌష్టికాహారానికై
పరులను  ప్రాధేయపడని సంఘంఉండాలని ఆశ!

ఆశే మనిషికి నాగరికత నేర్పింది.
కానీ....
నాగరికత మరిచిన నాయకులూ
లక్షల కోట్లు లగాయించి మింగుతున్నారు...
ఆశ మానవాళి అభివృద్ధికి చుక్కాని కావాలని నా ఆశ....

నగునూరి రాజన్న