ఆలాపన

ఆలాపన

తేది 03-03-2020

శీర్షిక: కనులు మూసినా...... 

సంఖ్య: 363

ముదము గొలిపే ముచ్చటైనను

మదిని తాకిన మతలబైనను

అంతరంగమును కదిలించిన అచ్చెరువైనను

ఆత్మను తట్టిన అపురూపమైనను

మరుపురాని మెరుపు సంఘటనలైనను

దిగ్భ్రాంతిని దిగమింగిన దిటవైనను

ముప్పిరిగొన్న ముచ్చమటల భయానకమైనను

మసక మసకగా మనోఫలకంపై కదలాడుతూ

మనసున కలవరిస్తూ మాటన  పలవరిస్తూ

సమయాసమయాలను సందర్భాలను మరచి

కనులు మూసినా....  తెరిచినా...... 
కంఠం సవరించినా .... 

లోలోపలి లోతుల్లోని స్మరణకు సంకేతమై

అప్రయత్నపు అలవాటుగ.... అలవోకగా...

పలవరించే పలుకులు....నిలువరించే నీడలు....

ఆలపించే అప్రయత్నపు మధుర గీతాలు.....

మధు మాసపు ఉదయ సంధ్యన

పల్లె తరువుల పచ్చని మలయ మారుతంలో 

పక్షుల కిల కిలా రవము కూడిన

నులివెచ్చని రవి కిరణాన

నెచ్చెలినుదురు తాకే ముంగురుల

ముగ్ద రూపం పదే పదే మనమున

దోబూచులాడుతున్నది...... 

నగునూరి రాజన్న

కరీంనగర్