మనసు పెడితే...
తేది- 16-03-2020
శీర్షిక- మనిషికి సాధ్యమే సుమా!
సంఖ్య- 370
రాతి గుహల జాడల్లో తచ్చాడిన
మానవుడు చక్రం తిప్పిన చరిత్రతో
అడుగు తీసి అడుగు వేస్తూ అంచెలంచెలుగ
ఎదిగి సంఘజీవి అయ్యాడు.....
జక్కన్న చేతిలోని జనం మెచ్చిన శిల్పమోలె
పడావు పడ్డ నేల తల్లికి పచ్చకోక చుట్టాడు...
సాగరాలను సొరచేపలా ఈదగలిగి
సముద్రగర్భాన్ని శోధించి సాధించాడు....
ఆకాశమార్గాన పక్షిరాజై పరుగెత్తగలిగి
అవని మొత్తంగా చుట్టేయగలిగాడు...
అనంత విశ్వ ఛేదనతో పాలపుంతల
పరిక్రమలను సైతం పసిగట్టే స్థితికొచ్చాడు....
అంతేనా అంటే....
కోట్ల జనాల కష్టాన్ని కూడా కొల్లగొట్టగలడు
కాలయముడై కబంధ హస్తాల బంధించి....
చర్వితచరణమైన చరిత్రలు చూసినా
చలించని ప్రబుద్దులు.. కలికాల మహిమలో...
కష్టమైన మంచి పనులకు కాలమెక్కువ
కడహీనపు పనులకు కష్టం తక్కువ....
శత్రుత్వంతో మూడు..మిత్రుత్వంతో అరంటూ..
జయవిజయుల జన్మ రహస్యాల వలె .....
మంచైనా చెడైనా మనిషికి సాధ్యమే సుమా!
నగునూరి రాజన్న
హైదరాబాదు.
No comments:
Post a Comment