వివేచనం
తేది 28-02-2020
శీర్షిక - సమపాళ్ళ అవపోశనం
సంఖ్య- 360
జీవరాశుల్లోకెల్లా ఉత్తమం
మనిషి జన్మందామా అంటే...
అందరికి సమంగా ఉండదాయే!
అమ్మల పెంపకమే అసలు
రహస్యమందామా అంటే....
అందరిని పెంచేది అమ్మలే కదా !
అక్షరజ్ఞానం అందించిన
గురువర్యులది అందమా అంటే....
అందరికి విద్యలందించేది ఆ గురువులే కదా!
నాగరికత నేర్పిస్తుందనుకుంటే
గల్లీలో ఉన్న పాటి పొరుగు నమ్మకం
ఢిల్లీలో కూడా దొరకపాయె.....
ఆణిముత్యాలన్నీ ఆల్చిప్పలో జారిన
స్వాతి చినుకులే అయినా
స్వాతి చినుకులన్నీ ఆణిముత్యాలు కానట్టే...
ఆత్మీయతల రంగరింపుల అమ్మతనం
అసువులు నిలపే అమృతతుల్య భుక్తవిధానం
గురుతర బోధింపుల గురుత్వం
సాన బెట్టి నేర్చుకున్న సహజీవనం
బతుకు జీవన గమనంలో సంఘ జీవనం
బరువు బాధ్యతల జవాబుదారి పాలకగణం
సమపాళ్లలో అందించిన అవపోశనం.....
మంచి చెడులకు మధ్య జరిగే
రేఖామాత్రమైన ఆలోచనా సంఘర్షణల
వివేచనే మానవాళి సంక్షేమం కోరుతుంది...
పవిత్ర మానవ జన్మకు ఊపిరిగా నిలుస్తుంది...
నగునూరి రాజన్న
కరీనగర్
No comments:
Post a Comment