వాన పాట
తేది :23-07-2024
వాన చినుకు పడితేనే
అవని మేను పులకరించు ...
నింగి నేల ఒకటైతే
ఎదురులేని జీవితమే ....
గ్రీష్మ ములు దాటిపోయి
శీతలమై అరుదెంచును ....
సంతోషాలు మోసుకొచ్చి
సంబరాలు మూటగట్టును ...
సమయం అరుదెంచెనని
సలిలము ఆవృతమవగా
సంద్రముల సంగ్రహించి
వానమ్మై కురిసిపోవును ....
వాన చినుకు పడితేనే
అవని మేను పులకరించు ...
బొట్టు బొట్టు చేరిపోయి
గట్టుదాటి ప్రవహించు ....
స్వచ్ఛమైన సెలయేళ్ళు
గంగమ్మగా పొర్లిపోవు ....
నిశ్చయముగా నిండును
బోనమును పోలినట్టు ...
ఆనకట్టలన్నియును
చూలాలును పోలినవి ...
వాన చినుకు పడితేనే
అవని మేను పులకరించు ...
ప్రకృతిలో పరవశము
చెట్టుచేమ విచ్చుకొను ....
కొండ కోన సెలయేళ్ళు
కొసిరి కొసిరి మురిసిపోవు ...
జీవరాశి మోములోన
ఆనందం వెల్లివిరియు ....
మానవాళి సంబరాన
ఏరువాక సాగిపోవు .....
వాన చినుకు పడితేనే
అవని మేను పులకరించు ...
బంగారు పంటలకు
అంకురములు మురిసినవి ...
రైతన్న మోములోన
చిరునవ్వు మెరిసినది...
జనులందరి మోములలో
చిరునవ్వులు చిందినవి ....
విశ్వమున కరువునకిక
చోటు లేదన్నది...
వాన చినుకు పడితేనే
అవని మేను పులకరించు ...
నింగి నేల ఒకటైతే
ఎదురులేని జీవితమే ....
No comments:
Post a Comment