ఆ చల్లని సముద్ర గర్భం
తేది : 22-07-2024
శీర్షిక :
తెలియని బడబాగ్నులే ..
సహస్రాధికం
ఒకటా రెండా ....
నాకన్నా ముందు నుండే మోస్తూ
నేను పుట్టినప్పటినుండి లెక్కేస్తే
పుణ్యముహుర్తాలెన్నో ఎన్నెన్నో ...
అడుగడుగున పలకరించే
కష్టాలను అధిగమిస్తూ
చెప్పలేని బాధలను
ఒప్పులకుప్పగా రాశి పోసాడు ....
మన కాళ్ళకు మట్టి అంటకుండా
నడిపించడానికి... తన కాళ్లకు
బొబ్బలెక్కించుకుని...ప్రేమగా ఏమి
లేదని బుకాయించిన ముచ్చట ....
భగభగ మండే సూర్యుణ్ణి
అడిగితే తెలువదా .... తన
నీడనే గొడుగుగా చేసి నా మేను
కందిపోనీకుండా కాపాడిన వైనం ...
టపటప రాలే చినుకులనడిగితే
చెబుతాయి కదా .... తన పైపంచె
మనకు కప్పి తడవనీయని
గొడుగుగ మనకందించిన విషయం ...
గజగజ వణికించే చలిని
అడిగితే చెబుతుంది కదా ...
కౌగిలిలో ఒదిగి కాపుకున్న
వంటి వెచ్చదనం విలువ .....
తనకన్నా పై ఎత్తున చూడాలని
తన ఎత్తు పిల్లలను పెంచడానికి
తనకు తాను నాన్న ఎన్నిసార్లు
కుంగాడో ... ఎన్నిసార్లు వంగాడో ...
అన్నీ తెలియని బడబాగ్నులే .....
నగునూరి రాజన్న
No comments:
Post a Comment