చిత్ర కవిత - 2 ( కూలిన పెంకుటిల్లు )
తేది : 29-07-2024.
శీర్షిక : వారధి
పచ్చని పల్లెలో పుచ్చపువ్వులా
విచ్చుకుని కిలకిలా నవ్వింది ...
పెంకుటిళ్లయినా పరిమళాలతో
ప్రశాంత నిలయంగా సందేశమై
సంతృప్తుల సమాధానమే ....
నానమ్మ తాతయ్యల రెక్కల కష్టం
తరాలను తరలించిన ఉద్దండురాలు
పురుళ్ళను పుణ్యాలను వెళ్లదీసి
పండగలకు పబ్బాలకు ముస్తాబైన వాకిలి ....
ఆత్మీయతలకు శ్రీకారం చుట్టి
అనురాగాలను చుట్టుకుని
అనుబంధాలను అల్లుకుని
మురిసిన ముద్దబంతి తోట అది ....
పెదనాన్నలకు అత్తలకు పెళ్లిళ్లు
పేరంటాలతో పెద్దముతైదువనే ....
నాన్నకు... అమ్మ దారి తెలిపి
మా అందరి పెళ్ళిళ్ళను
పేరంటాలను మురిపంగా తీర్చి
మమ్మందరిని మురిపించిన దర్పపేటి ...
అమ్మ ఒడిలో ఆడుకున్న దాఖలాలు
అన్నదమ్ములతో ... అక్కచెల్లెళ్ళతో
మిత్రులతో పిల్లలతో ఆడి పాడుకున్న
మధుర జ్ఞాపకాల ప్రత్యక్షాలు ...
ఆడబిడ్డల సారెచీరెలకు సారథి
అతిథి అభ్యాగతులకు సోపతి
నిత్యం వచ్చేపోయేవారికి వందల
మందికి ఆనాటి అపురూప వారధి.....
నగునూరి రాజన్న
No comments:
Post a Comment