యాంత్రిక జీవనం

యాంత్రిక జీవనం

పల్లెల్లోన పలుకరింపులే
మల్లె పూల పరిమళాలు
మృష్టాన్న పాయసాలు
మానవత్వపు  మమతానురాగాలు
ఇరుగు పొరుగులతో  ఇచ్ఛమై
ఇగురించును ఆప్యాయతలు
కచేరి దగ్గర చేరుకునే సాయం కలయికలు
కష్ట సుఖాల కడలి సంపద పంపకాలు
బోనమెత్తే ఉమ్మడి కుటుంబాలు
బతుకమ్మలాడే ఊరు ముత్తైదువలు
సంబరాల్లో మునిగి తేలు పల్లె వాడలు
సంక్రమించు సందళ్ళ కలుపుగోళ్ళు

పట్టణాల జీవితాలు
సమయ సూచీ ముల్లుల్లాగా
అంటి ముట్టదు అవతలి వాళ్ళను
అంతు చిక్కదు సొంత వాళ్లకు

స్వార్థ చింతన పెరిగిన  మానవాళి వల్ల
పసివాడి పాల దగ్గర నుండి
ప్రాణాలు కాపాడే ఔషధాలవరకు
కలుషిత కాసారాలౌతుంటే
కంటకింపైన చర్యకు ప్రతి చర్యలాగా
అవతరించరా మనసు లేని మానవాళి
ఆచరించరా యాంత్రికంగా ....

స్వకుంటుంబ సభ్యులతోనే
సావాసాలు చేయలేక
సంతోషాలు పంచుకోలేక
సందు దొరికితే చాలు
వేరు కుంపట్లకు వెంపర్లాడుతుంటే
యాంత్రికమవదా మానవ జీవన యానం .....