పరిచయం అక్కర లేని పదార్థం

కనిపెట్టిందెవరో కానీ కనికట్టే చేసింది 
కట్టగట్టి ప్రపంచాన్ని కబలిస్తున్నది 
కమనీయపు రంగులలో కలుపుగోలుగా  

కడు రకాల వస్తువులుగా అందుబాటైనాయి 

    

పల్లె పట్నం తేడా లేకుండా
పాదాలనుండి శిరస్సు వరకు
పళ్ళుతోమే పుల్ల నుండి కళ్ళ లెన్స్ లు
పాదరక్షలనుండి దువ్వెనల వరకు 

స్వచ్ఛమైన పాల నుండి మొదలుకుని 
సరసమైన వంట సరుకుల సంరక్షణకై 
పరుచుకుని నిదురించే చాపలనుండి
పంటలకవసరమయ్యే సంచులవరకు

అది ఇది అనే అంతరమే లేదు 
అందరికీ అందుబాటులో ఉంటాయి 
ఆడా , మగ ,పిల్లా పాప, ముసలి ముతక 
ఆట వస్తువుల నుండి అంతరిక్ష నౌక వరకు  

ప్రతి పనిలో ఉపకరణాలుగానే కాకుండా
పాయసాల పానీయాల వడ్డనాలలో
పండగల పబ్బాల పందిల్లలో

పెళ్ళి భోజనాలకు “విస్తరి”ంచింది  

వందలేండ్లయినా వదలని ఆయుష్షు కలిగి 

వయ్యారాలు పోతూ వణుకు పుట్టిస్తున్నది 

జీవం లేనిదైనా జీవరాశికి సవాలుగా నిలిచి 

జన జీవనాన్ని అతలా కుతలం చేస్తున్నది  

ప్రకృతినుండే ప్రాణప్రతిష్ట గావించుకున్నా 
పంచభూతాలలో కలిపితే మాత్రం
ప్రచండ ప్రద్యూషణాల కారకమౌతుంది
ప్రపంచాన్నే గడ గడలాడిస్తుంది 

పాలకులకు పట్టించుకునే సమయం లేదు 

ప్రజలు  అధికారులు ఆలోచించడం మానేసారు 

ప్లాస్టిక్కు , పాలిథీన్లకు  ప్రత్యామ్నాయాలు  పరిశోధించాలి 

విశ్వ రక్షణకై  వినూతనంగా  వైజ్ఞానికులు ఇకనైనా.