ఆధిపత్యం పోరు

ఆధిపత్యం పోరు ప్రతీ చోట

అదేకదా మన భారతీయత్వం 

అర్థం కానివ్వదు ఆచరించేవారికి 

అంతు చిక్కదు అనుభవించేవారికి 

ఎందఱో మహానుభావులు 

ఎదురు నిలిచి పోరారు 

అరమరికలు లేని కరంచంద్ 

అందించాడు అహింసతో 

అందిపుచ్చుకున్నాడు ఆసనం 

ఆడంబరాల జవహరుడు 

అది మొదలు పారంపర్యం 

అంచెలంచెలుగ పెరుగుతూనే ఉంది 

మధ్యలో మనుషులు మారినా 

మారలేదు ఏ కోశానా 

మారినా తారు మారు 

మన బ్రతుకులు మరో మారు 

ప్రపంచాన ఏ దేశాన 

ప్రస్ఫుటం కాని  ఆధిపత్యం 

పట్టుకుని వేలాడుతుంది 

పదిలంగా మన జాతీయత్వం 

కేంద్రం రాష్ట్రాలపైన 

రాష్ట్రాలు ప్రాంతాలపైనా 

మొన్న తమిళం లో  తెలుగు 

నిన్న తెలుగులో  తెలంగాణం 

ఓటు వేసి గెలిపించిన పౌరుడే 

నీటుగా నిలదీయలేడు కౌన్సిలరునైనా 

ఆధిపత్య పీచమనగదీయగలిగే రోజులు 

ఎప్పుడొస్తాయో ఎదురుచూడవల్సిందే  

ఆరోగ్యకరమైన ఆధిపత్యం 

అభివృద్ధికి మూలధనం 

అదేకదా రామరాజ్య సూత్రం 

అందుకే యుగాలు మారినా ఉత్తమం