అలసిన మనసులు
తేది : 07-08-2024
శీర్షిక : పేరుకు రాజు
సహస్రాధికం
భువనమంతా బువ్వ పెడుతూనే…
బువ్వ కొరకు పాకులాడుతూనే
ఉన్నాడు...నలుగురికి పెట్టాలని తాను
ఐదు వేళ్ళతో ముద్ద నోట్లో పెట్టుకోవాలని ...
ఏదీ...తీరని కోరికై తిమిరంలా
వెన్నంటి వస్తుంటే ...అలసిన మనసులు
తెములుకునేదెలా...సకాలంలో .
వరుణుడు కరుణిస్తేనే సాగుతుంది...
మాయమవుతున్న మరకతం
మానవ అలసత్వాలవాలం
మలిన కాలుష్యాల కాసారం
మారిపోతున్న క్రమబద్ద వర్షపాతం ...
కల్తీలు నిండిన విత్తనాలు
ఫలితమీయని కీటకనాశనీలు
అదృష్టంకొద్దీ అన్నీ దాటుకున్నా
అకాలవర్షాల అవాంతరాలు ...
దలారీల మోసపూరిత దాష్టీకం ....
అందుబాటుగాని గిడ్డంగుల వ్యవస్థ ....
నడ్డివిరిచే అడ్డగోలుకు వడ్డీలు ...
పద్మవ్యూహంలో పసివానిలా
ఒక్కడై పోరుతున్న నిక్కచ్చి యోధుడు ....
రాజంటూ పేరుకు కితాబులే గాని..
రాలనీయని కాసుల కథలే కష్ఠానికి
తగినట్టుగా ...అధికారపక్షమైనా
ప్రతిపక్షమైనా మొసలి కన్నీరే ....
నగునూరి రాజన్న
No comments:
Post a Comment