అంశం : అమ్మ
శీర్షిక: అమ్మదనంలోని కమ్మదనం.
అనంతానంత విశ్వాధీనం
ఆ పరంధాముడిదయినా
అందరిని అలరించ తలచి
అమ్మగా అవతరించె ఇంటింటా ...
కంటపడని నలుసు రూపాన్నే
కండరాల పొత్తిళ్ళుగ చేసుకుని
కళ్ళల్లో వత్తులేసుకుని కాలపు
కాపలా దివిటీలు వెలిగిస్తుంది...
తనువునర్పించు తదాత్మ్యమై
తల్లి తేలు తన పిల్లల జన్మకై
పొట్ట చీల్చి పుట్టంగ భువిన
పొందించె పరమాత్మ సన్నుతంగ...
పదుల సంతానాలనైనా పదిలపరచు
పస్తులుండైన కలిగినంతలోన.. అమ్మ
తనయులెంతమందైన తావి చూడరె
అవసాన దశలోన ఆత్మీయంగ పలకరించ...
అమ్మ నాదంటు అలిగి పోరెదము
ఆటాపాటల్లోన తోబుట్టువులతోడ
ఆనక పెద్దయ్యి... ఆవలికి తోసేము
అన్నంటే తమ్ముడని.. కాదు అన్నని ...
తనువు చాలించి తానెల్లిపోతే
తండ్లాడినా మళ్ళీ కంట కనిపించదు
తనువుండగానే తరించుట మేలు
తనివిదీర సేవలందించుకుని
అమ్మదనంలో పెనవేయు కమ్మదనం
ఆస్వాదిస్తే అవుతుంది ద్విగుణీకృతం...
నగునూరి రాజన్న
కరినగరము.
No comments:
Post a Comment