అంశం : జీవన చిత్రం
తేది : 09-11-2020
సవ్వడి సంఖ్య : 37
శీర్షిక : ప్రయత్నిస్తే...
నలుపు తెలుపుల నర్మగర్భతా
సప్త వర్ణముల సలలితమా
గమనమంతా గగన గంభీరతే
గమ్యం నిర్ణయించుకోగలిగితే ...
నియంత్రణ అధీనమే అనిపించినా
నిలుచు విధాత చేతిన విచిత్రంగా
కన్నవారి కంటి చలువల ప్రసరణ
గురువు జ్ఞానంతో విప్పారే మనోనేత్రం ...
ఎంచుకున్న వృత్తిలో
ఎదురయ్యే కష్టాలను ఇష్టపడి
ఎగుడుదిగుడులను నమ్మకంగా
ఎదురీదే గుణముండాలి ....
అచంచల విశ్వాసాన్ని
ఆలంబనగా అక్కున చేర్చుకుని
కృషి పట్టుదలలే పెట్టుబడిగా
దీక్షా దక్షతలకు చిరునామాగా
సాగిపోతే సాధించలేనిదేమిటి ?
క్రమశిక్షణలతో కవాతు చేస్తే
కమతం పంట పొలమైనట్లు
మోడు వారిన బీడు మెదడు కూడా
ప్రయత్నిస్తే సవాళ్లనెదుర్కునే
సరంగౌతుంది....
నగునూరి రాజన్న
No comments:
Post a Comment