నిదురించిన నిశ్శబ్దం

నగునూరి రాజన్న 

అంశం- నిదురించిన నిశ్శబ్దం 

తేదీ - 15 -10 -2019 

శీర్షిక - ప్రాణ వాయువు సంత వస్తువు.....

సంఖ్య - 304 

కలి నీడల కబంధ హస్తాలో

కాల మార్పుల ప్రభావ కల్మషాలో

కాలం మారిందని సరిపెట్టుకోవాలో 

స్వార్థచింతనల పెనవేతలతో

కలసికట్టుగా మనుషులంతా  

కసిగట్టినట్టు కక్ష సాధిస్తుంటే 

అలసత్వాల జోల పాడుతుంటే......

పసిమి ఛాయల ప్రకృతి సోయగాలు

పల్లవించే కొండచాయల నీటి జాడలు

అల్లనల్లన వీచే పిల్లగాలుల వాలు తెమ్మెరలు

అందాలారబోసే సుందరమైన లోయలు 

అన్నీ కథలలో మాత్రమే ప్రస్తుతించే కథా వస్తువులవుతుంటే.....

కలుషితాల పుణ్యమా అని 

కడుఁపు మంటలార్చుకునే 

కమ్మని మంచినీరు సైతం

కాసుల కొలతలయి పోయాయి.....

స్వార్థాలమాటున సక్కబెట్టుకుంటున్న

సందట్లో సడేమియాల్లాంటి దళారీలు

ఆగడాలు శ్రుతిమించుతున్న రాబందులు

పారిశ్రామిక ఫలితాలని వల్లె వేసినా......

ముంచుకొచ్చే ముసలంలా 

నిదురించిన నిశ్శబ్దంలా ఎంతో దూరం లేదు 

దుమ్ము ధూళిలో కొట్టుమిట్టాడుతున్న 

ప్రాణాలు నిలిపే వాయువులు సైతం 

పణంగా దొరికే సంత వస్తువు కావడానికి .... 

నగునూరి రాజన్న

కరీంనగర్.