చెద పురుగులు

నగునూరి రాజన్న
అంశం - చెద పురుగులు
తేదీ - 10-09-2019
శీర్షిక - చెద పురుగుల వ్యాప్తి
సంఖ్య - 284

అవిభాజ్యాలు అంతరించి
ఆత్మీయతలు సన్నగిల్లి
కునారిల్లుతున్న కుటుంబ వ్యవస్థల్లో
అంతంత మాత్రంగానే మిగిలిన
అనుబంధాల తడబాటుల్లో
అమ్మా నాన్నలను ఆశ్రమాలకు
అప్పచెప్పడం .... ఇంటినుండే
ఆరంభమయిన చెదపురుగుల ఆనవాళ్లు ...

పల్లె పిలుపుల పావురాలు తగ్గి
పట్నం పోకడల జీవితాల్లో
పలకరింపులు కూడా కరువై
పక్కవారి సహాయ సహకారాలకు కూడా
పక్కాగా లెక్కగట్టే ఆర్థికాంశాల ముచ్చట్లలో
పలు విధాలా కల్తీలతో సంఘమంతా విస్తరిస్తూ
సవిస్తరమౌతున్నాయి  చెదపురుగుల జాడలు ....

పొరుగు క్షేమం పొందు లాభం అని తెలిసినా
పక్కవాడు సక్కగుంటే పాణం ఓర్వనట్టు
మన అంతరంగిక పాలనా సౌలభ్యాన్ని పనిగట్టుకుని
అక్కరలేని ముచ్చట్లతో విషతుల్యం గావిస్తూ
అంతర్జాతీయ వేదికల మీద అరిచి గీపెట్టినా
ఆదుకున్నోడు కానరాక...  కుట్రలు కుతంత్రాలతో
కరడు గట్టిన ముష్కరులకు కపట ఆదేశాలిస్తూ
చాప కింద నీరులా చుట్టేస్తున్నది
చెదపురుగుల వీరంగం.....


నగునూరి రాజన్న
కరీంనగర్ (USA)