వరదగూడు

వరదగూడు

తేది- 20-01-2020

శీర్షిక - వాన జాడలు

సంఖ్య - 346

స్వచ్ఛ వాతావరణం సన్నగిల్లిపాయే 

నిర్మలత్వం మాట నీటి మూటలాయె 

ముందస్తు హెచ్చరికల ముచ్చటలు 

మురిపమై నిలిచే ఒకప్పటి మాటన్నట్టు..... 

కాకతాళీయమో కక్ష సాధింపో 

కాలుష్య రక్కసుల కదనాలతో

కలుషిత భరితమాయె కాల చక్రం 

కాలేదు మినహాయింపు మనిషికి సైతం.....

కాల మహిమల కడ చూపులకు

కకాబికలమే కాడెద్దుల రైతన్న

కళ్ళు కాయలు కాసే ఎదురుచూపులు 

కనికరించే ధరణి బతుకుల తడికై... 

శాస్త్రమెంత క్షిపణి శరవేగమైనా

సమ్మతమైన ప్రకృతే ఏరువాకకు 

సందట్లో సడేమియాల్లాగా గంటల్లోన  

క్యుములోనింబసులంటూ కుమ్మరించవట్టె...

రంగుల హరివిల్లు బోలు రవి శశి ఛత్రపు

జాడలు గత చరిత్ర సృతులై నిలిచె...

వరదగూడు తెలుపు వాన జాడలు

కనిన కడు సంబరము గాదె రైతన్నకు....

నగునూరి రాజన్న

కరీంనగర్.