కడుపు తీపి

కడుపు తీపి  

తేది - 30-11-2019

శీర్షిక - ఓ కమ్మని అనుభూతి  

సంఖ్య :325

శాస్త్రాలు సమగ్రంగా నిర్వచించాయో లేదో  

సంప్రదాయాలు సవివరంగా  వివరించాయో లేదో ... కానీ  

సకల చరాచర ప్రాణకోటిలో.... సమమయిన 

మాటలకందని ఊహలకందని ఓ కమ్మని అనుభూతి..... 

ఎలా ఉంటుందంటే ఏం చెబుతాం ? 

కడుపున పడిన క్షణం నుండి 

కంటి చూపుకింకా కానరాకపోయినా 

కలలు కంటూ ... కదిలితే ఎక్కడ 

కందిపోతుందోనని కలవరపడ్డాననా .... 

ఎంత ఉంటుందంటే ఏం చెబుతాం?

పుట్టీ పుట్టగానే పుట్ట బొమ్మలా చూసుకుంటూ 

పుట్టిన ప్రతి క్షణం నుండి పట్టం కడుతూ 

పట్టి పట్టి ప్రతీది శక్తికి మించి సమకూర్చుకుంటూ  

పెట్టి పుట్టిన దాఖలాలు దకలు పరిచాననా .... 

ఎందుకుంటుందంటే ఏం చెబుతాం ? 

అణువణువున  మన తనువేనని 

అహోరాత్రుల మన ఆరాట పోరాటాలు    

ప్రతిరోజు  పడే తపన వాళ్ళ ఉన్నతికేనని .... 

తల్లిదండ్రులైతే తప్ప అర్థం కావనా ..... 

 

ఏ విధంగా తెలియ చేయను ?

ఢిల్లీకి రాజైనా తల్లితండ్రులకు సంతానమేనని 

ఆస్తులు అంతస్తులు మణులు, మాణిక్యాలు, 

నవరత్నఖచిత చీని  చీనాంబరాలు 

అన్నీ కడుపు తీపి ముందు దిగదుడుపేననా ... 

 

ప్రపంచాన పదిలంగా ఫరిఢవిల్లుచున్న 

కడుపు తీపి.... ఓ కమ్మని అనుభూతి.... 

కవితలకో..... కథలకో.... అంతుబట్టనిదని  

భాషకందని భావనని.......సాహిత్యానికందని...సంపదని 

సకల చరాచర విశ్వంలో సంభవించే 

ప్రకృతి మాత సంతరించుకునే సంపూర్ణత్వం.....   

నగునూరి రాజన్న 

కరీంనగర్