శిలా ఫలకాలు

శిలా ఫలకాలు 

తేదీ - 04.12. 2019

శీర్షిక - ఫలకాలు ..... 

సంఖ్య - 327 

మర్కట మూలాల మనిషనే 

మతలబుల మూటలు విప్పిన 

చర్విత చరణాల చరిత్రలకు 

చెక్కు చెదరని నిలువెత్తు సాక్ష్యాలు ..... 

ప్రాచీన చరిత్రలకు పవిత్ర మూలాలు  

అంతులేని ప్రశ్నలకు అవే ఆధారాలు  

నాటి జీవన  విధానాలకు అసలైన ఆనవాళ్లు 

భావి గమనాలకు మార్గదర్శులు.. శిలా ఫలకాలు

తామ్ర ఫలకాలు.... రాతి ఫలకాలు.....అనేకాలు... 

నాటి మాటైతే...... 

రాజుల రోజులు పోయి రాజ్యాలు మారినా 

పేర్లు మాత్రమే మారాయంటూ సాక్ష్యంగా

కొన్ని ఫలవంతమైతే చాలా మాత్రం  

కాగితాలకే పరిమితమై కవాతు చేస్తూ 

అర్ధణా కోడికి అరకిలో మషాలా లాగా 

అక్కరకు రాని చుట్టం మొక్కిన వరమీయని చందంగా 

దౌత్య మర్యాదల  దండుగ నామాలతో 

చాంతాడంత చిట్టాలకే  పరిమితమయ్యి   

చెత్తంతా నింపుకుని వట్టిపోయిన 

బోరుబావుల్లా ఉరూరా ఉనికి పోరాటాలు 

చేస్తూ వెర్రి జనాలను వెక్కిరిస్తున్నాయి .....

అర్రులు జాపే  అధికార ప్రతిపక్ష

డాంబికాలకు దర్పమై  దర్శనమిస్తూ

కరటక దమనక కమామీషులలాగా   

నిష్క్రియా కార్యాలకు మూలమై  

పేరుకుపోతున్న ఖనిజరాశి.....  

 ఈనాడు.....    

నగునూరి రాజన్న