జై జవాన్ - జై కిసాన్ అని శాస్త్రి గారన్నా
రైతే రాజని నానుడే ఉన్నా
రెక్కాడితే కాని డొక్కాడని రైతన్నకు
లెక్కకు మించిన నష్టాలు -కంటికి కనపడని కస్టాలు
అమెరికా అధ్యక్షుడికి అయినా
ఆరు గాలం కష్టపడే కూలన్న అయినా
అన్నము - రొట్టె ఆహారమౌతుందే కాని
అన్యము తీర్చదు ఆకలి మంటలని
ఇడుగు ఇరువాలు దున్నుకునే రైతన్నకు
ఇగురం తెలియక ఇరుకున పడ్తున్నడు
యవుసం చేయలేక సత మత మౌతున్నాడు
ఉపాయం ఎరుగక ఉక్కిరి బిక్కిరి అవుతున్నాడు
నకిలీ విత్తనాలు మొదలుకుని ఎరువులతో
నడుం విరిగి నట్టేట మునుగుతున్నడు
కరువులు కాటకాలు కక్ష గట్టి కాటేస్తున్నాయి
అతివృష్టి, అనావృష్టి, అకాల వర్షాలు ,అధిక ధరలు
విద్యుచ్చక్తి విరామాలు, భూమి పన్ను,నీటి పన్ను
ధాన్యం రవాణా, ధాన్యం ధర నిర్ణయం లో
కడకు అధికారులు, దళారులు,ప్రభుత్వాలు
ఇలా ఎవరి వంతు వారు తలా కొంత ,
కర్ణుడి పతనానికి కారణాలనేకం అన్నట్టు
ఆరు గాలం చేసిన కష్టమంతా ఆవిరైపోతున్నది.
భూమిని నమ్ముకోవడం కన్నా అమ్ముకోవడమే
భుక్తికి మార్గమని నమ్మే దశకు చేరుకున్నాడు మన రైతు
బ్రతుకు తెరువు చేసుకునే బడా వ్యాపారులు గాని
బ్రతుకే వ్యాపారమనుకునే నాయకులు గాని
నిద్రాహారాలు మాని సంపాదిస్తున్నారే గాని
దూర దృష్టి కలిగి బ్రతికించు కోవాలి మన రైతన్నను
No comments:
Post a Comment