వన దేవత జన జాతర

అర విరిసిన మాఘ పౌర్ణమిన మహా జాతర 

ఆసియాలోనే అతి పెద్ద కోయ జాతర 

ఏడు విడిచి ఏడు వస్తుంది 

ఎద ఎదలో సంబరాలు నింపుతుంది 

మేడారం సమ్మక్క  జన జాతర సంబరం 

మేను పులకరించి తాకుతుంది అంబరం 

తోటి వారి కోసం ఏటికి ఎదురీది ఎగబడి పోరాడి 

వన దేవతలయ్యారు మన పాలిటి ఈనాడు 

గుడి లేదు గోపురం లేదనే చింత వలదు 

కుంకుమ భరణే కొండంత దేవత కొలువ  

వేదాలు లేవు మంత్రాలు లేవనే ఆలోచనే వద్దు 

వేల జనుల సమ్మక్క నామ స్మరణ ముద్దు 

కొలువడానికో రూపం లేదు విగ్రహం లేదనే కొరతే లేదు 

కోటొక్క జనుల కొంగు బంగారమై ఏలుచున్నది 

హారతి లేదు తీర్థం లేదనే హద్దే లేదు 

హత్తుకుని ఊరడించే అమ్మ మనసుందక్కడ 

కొండ కోనల్లో నెలవైన కోయ దేవతలు 

నిండు గుండెల్లోన కొలువై ఉన్నారు 

చెట్టు,చేమ,పుట్ట, గుట్ట కళ కళలాడాయి 

చుట్టు ముట్టు రాష్ట్రాలు తరలి వచ్చాయి. 

ఎదురు కోళ్లు , ఎత్తు బంగారం (బెల్లం),తల నీలాలు 

ఓడి బియ్యం, కోడె కట్టుట,బలి సాంప్రదాయ మొక్కులు 

కల్లా కపటం లేని సాక్షంగా నమస్కారం 

పిల్లా పాపాలనిచ్చి సల్లంగ చూస్తుంది 

చెక్కు చెదరని ఉక్కు నమ్మకమే 

సమ్మక్క, సారక్క నామ స్మరణం